Орхон сумын удирдах ажилтны шуурхай зөвөлгөөн 2015 оны 01 дүгээр сарын 29-ний өдөр ЗДТГазрын Иргэний танхимд боллоо. Зөвөлгөөнд сумын иргэдийн Төлөөлөгчдийн хурлын дарга С.Бат-Эрдэнэ, Засаг дарга О.Оюун, Засаг даргын орлогч Ж.Энхтуяа, Тамгын газрын дарга П.Цолмон нарын удирдах албан тушаалтан, төсөвт байгууллагын захирал, дарга, эрхлэгч,Тамгын газрын мэргэжилтнүүд, багийн Засаг дарга ,иргэдийн Нийтийн хурлын дарга, хүний эмч, малын эмч, байгаль хамгаалагч зэрэг нийт 42 төрийн албан хаагч оролцлоо. Зөвөлгөөнийг нээж Тамгын газрын дарга П.Цолмон үг хэлсний дараа Засаг даргын орлогч Ж.Энхтуяа аймаг, сумын Засаг даргын үйл ажиллагааны хөтөлбөрийн биелэлт, цаашид анхаарах асуудлын тухай товч мэдээлэл хийлээ.
Зөвөлгөөнд Тамгын газрын мэргэжилтнүүд, төсөвт байгууллагын захирал, дарга нар 2014 оны ажлын ололт амжилт, алдаа дутагдал, цаашид хийх ажлын чиглэл, анхаарах асуудлын талаар мэдээлэл хийж, семинар өглөө.
Зөвөлгөөний ажиллагаатай холбогдуулан Халиун багийн Иргэдийн нийтийн хурлын дарга Н.Базарсад, Засаг дарга Ч.Оюунчимэг, хүний эмч Б.Батболд, Мааньт багийн Засаг дарга Н.Бат-Өлзий, Эрүүл мэндийн төвийн дарга Д.Оюумаа нар санал шүүмжлэл гаргаж өөрсдийн үйл ажиллагаанд тулгарч буй хүндрэл бэрхшээл, түүнийг шийдвэрлэх арга замын талаар сумын удирдлага болон мэргэжилтнүүдтэй харилцан санал бодлоо солилцлоо. Энэ үеэр сумын Засаг дарга, төр, төсвийн байгууллагын Ерөнхий менежерүүд, багийн Засаг дарга нартай 2015 онд хамтран ажиллах гэрээг батламжилж гардуулах хүндэтгэлийн арга хэмжээ боллоо. Мөн 2014 онд эрхэлсэн ажилдаа амжилт гарган идэвхи зүтгэлтэй ажилласан төрийн албан хаагчдыг шагнаж урамшуулах, хариуцлагагүй ажилласан хүмүүст шийтгэл ногдуулах тухай сумын Засаг даргын захирамж болон Тамгын газрын даргын тушаалыг уншиж танилцууллаа.
2014 оны ажлаараа тэргүүлсэн Арбулаг багийн Малын их эмч Ч.Алтангэрэл, Мааньт багийн Байгаль хамгааалагч Д.Оюунбадрах нарыг сумын мал хамгаалах сан, байгаль хамгаалах сангаас тус бүр 50000 төгрөгөөр шагналаа. Ийнхүү сумын удирдах ажилтны зөвөлгөөн нь өнгөрсөн жилийн ажлын ололт амжилт, алдаа дутагдалдаа дүгнэлт хийж, цаашдын зорилго чиглэлээ тодорхойлсон ач холбогдол бүхий цаг, үеэ олсон шуурхай арга хэмжээ боллоо.
Зөвөлгөөнийг хааж сумын Засаг дарга О.Оюун хэлсэн үгэндээ бид бүхэн өнгөрсөн жилийн ажлаа хэлэлцэж, цаашид ажиллах семинараа авлаа. Бүх менежерүүд, багийн Засаг дарга нартай гэрээг байгууллаа. Гэрээгээ 100 хувь биелүүлээрэй гэж та бүхнээс хүсэх байна. Би аймгийн Засаг даргатай байгуулсан гэрээгээ дүгнэсэн. Энэ үеэр аймгийн Засаг дарга Д.Эрдэнэбатын бүх сумдын Засаг дарга нарт хандаж хэлсэн үгийг уншиж танилцуулав.
Манай сум өнгөрсөн онд 883 өрхийн 299414 толгой мал тоолуулсан. Малын тоон үзүүлэлтээр аймагт 3-т орж байна. Төрлөөр нь авч үзвэл тэмээнээс бусад малын тоон үзүүлэлтээр эхний 5-д явж байна. 2014 оны хяналт шинжилгээ үнэлгээний дүнгээр Төрийн захиргаа, Байгаль орчин, Газар, Мал эмнэлэг эхний 5 - н байранд, Нийгмийн даатгал, Батлан хамгаалах, Эрүүл мэнд, Боловсрол, Хөгжлийн бодлого, Төрийн сан аймагт 10-аас хойш байранд явж байгаа. Энэ нь дан ганц уг ажлыг хариуцаж байгаа мэргэжилтэнтэй холбож үзэхгүй байгаа. Багийн Засаг дарга нартай шууд холбоотой. Багийн засаг дарга нар хуулиар хүлээсэн үүргээ биелүүлэх ёстой гэдгийг зөвөлгөөний индэр дээрээс хатуу сануулж хэллээ. ЕБС хамран сургалт, СӨБ сургалтын чанартаа анхаарч ажиллахыг мөн сануулсан. Хөдөө багт ажиллаж байгаа байгаль хамгаалагч, хүний эмч нар ажилдаа идэвхи зүтгэлтэй ажилладаг гэдгийг онцлон тэмдэглэж байлаа.
Аймгийн хэмжээнд 2015 оныг хариуцлагыг нэмэгдүүлж, шинэ санааг бүтээлч шийдэл болгох жил болгосон.
Сумын хэмжээнд 2015 оныг ”ИЛ ТОД НЭЭЛТТЭЙ МЭДЭЭЛЛИЙН ЖИЛ” болгон ажиллана.
Цаашид удирдах ажилтны семинарыг жилд 2 удаа /хагас, бүтэн жилээр/ зохион байгуулж байхаар боллоо. Ийнхүү сумын удирдах ажилтны зөвөлгөөн, семинар амжилттай болж өндөрлөлөө.
БУЛГАН АЙМГИЙН ОРХОН СУМЫН ИРГЭДИЙН ТӨЛӨӨЛӨГЧДИЙН ХУРАЛ
БУЛГАН АЙМГИЙН ОРХОН СУМЫН ИРГЭДИЙН ТӨЛӨӨЛӨГЧДИЙН ХУРАЛ
http://orkhon.bulgan.khural.mn/ http://orkhon.bulgan.khural.mn/Удирдах ажилтны шуурхай зөвлөгөөн-2015
2015-08-24
